Dear Editor,
How is everything? Plenty talk going on about problems, people, policies, parties, politics, and principles, and, some only parroting others. Is a busy week for everybody, from Pressy to politicians, police, patients, pharmacists, pickney, parents, principals, pastors, pandits, preachers, players, public and private sectors, dem pros, planters, pick-pockets, de propogandists, and not to forget, dem who peeping into other people’s privacy. Is a pretty, long list but is a good point to peruse who performing and who ain’t producing. The PPP/C Govment and the PNC Opposition partnering in partisanship to protect de people and prevent any pugnacity from Venezuela.
We Western neigha planning to do a lot of things and dey promising dem people plenty things too at de price of provocation and prohibit peace from prevailing. But dey overlooking de ICJ has the final say and plenty powerful people in de international community backing we. Plenty Venezuelans don’t like what President Maduro doing, dat’s why millions of dem run and scattered all over de world. We got over thirty-five thousand in we own land and we accept dem because we heart big, we feel sarry for dem. All eighty-three thousand square miles make up we country and we are not de warrior type people. We country known for we hospitality and we does share what little we have because we care. We don’t like to see other people suffer, besides, Venezuela was nice to plenty of we who during the hard days, Burnham mek we run and live over there.
Dis country belong to you and me and all a we got to work as wan family so we can stand together as “One Guyana.” We ain’t taking no eye pass from nobody and no one gon take away not an inch of land that belongs to we. No body gon wake up one morning to find out that who living in Essequibo now living in Venezuela overnight. No sir, dat ain’t gon happen, not as long as all a we 65 MP’s see eye to eye and hold hands together singing Dave Martin’s “Not a blade of grass,” as we National Anthem and pledge we loyalty to defend we Muda land. Dem who burping acidity will remain asinine because dey don’t know dat de GDF is “all for one Guyana and one Guyana for all.” Tell dem me Loo say dat in bold black and white. I man is no Brooklynite and a know me Guyanese brothers and sisters.
Things does change when we change the way we look at things and when we become the change we want to see. We see nuff wrong in de past and we have to stop the blame game. Plenty a we say nuff nuff wrong things to satisfy we own agenda but the days are here when we get ketch out. Plenty of dem overseas telling we how to do things and how to run de country but dey don’t want to come and live here and experience we lifestyle. If de foreign land has all de big buildings and bright lights and de money to trap you like magnate, noting wrong. We also have everything here and we happy with we dhal and rice, bagee and fry fish and yes, we black cake and black out too.
Watch na, outside people telling we, how we got discrimination. Now dey leff wid dem mouth open with them 4 local women opening a company call Sispro Inc. We govment awarded dem not one but two oil blocks for dem to explore and produce oil. Awe govment didn’t stop there. Dem went one more step and award another Guyanese firm two more oil blocks. Dem company name International Group Inc. and is led by two lawyers, Dr. Wilson Ode and Dr. Esther Odoe. Guess what? None of dem two companies got any linkage to de Govment and de Govment don’t know dem fada. We own Guyanese boy Floyd Haynes who own NewHayven Merchant Bank, supporting local business with US$15 M. Dis equal opportunity spreading like wild fya.
A tell yu, who come up wid de idea dat dis Govment prejudice, dem need to see de doctor fo more than dem eyes. Imagine, de AfriCaribbean Trade and Investment Forum decide to hold dem conference right here in Guyana and some 1500 people come from 33 countries to attend. If dis govment was bias, yu think dey would a choose we country to hold dis big meeting? And on top of dat, de African Export-Import (Afrexim) Bank will provide a loan of US$500 M to cover infrastructure in we country. Remember all of dem who use to criticize the govment dat dey wasting de oil money by spending too much on infrastructure drive? Well, let dem put dis in dem pipe and smoke on dat. Dis macroeconomics too macho fo dem! Africa supporting de PPP/C Govment man, yu hear dat? If not, yu ears got wax.
Since we gain independence, all dem river is we wata and no bady gon charge we to fish in we own wata or ban we from growing “ban carila” on we land. No bady gon tell we, we can’t sell what belongs to we or pump and dig out we own resources. No bady gon stand in we way to deprive we Indigenous sisters, brothers and children from implementing dem 500 projects in de hinterland which de carbon credits financing. Pressy want everybody must travel in comfort from Lethem to Linden on highway road. Yu see how much he doing fo Linden? De Ranger who is a stranger, never do so much.
As fo me, the less I watch, de more I see and is better for Linden. But I still can’t carry dis empty bowl fo Linden to full. Dem gon ask me if I can’t see peace, progress and prosperity fo dem Lindeners since Pressy tek over? Dem Senators didn’t come on no “fact finding” trip. Dem come to find no fact exist on de tour. So when dem two Goliaths in de US talk about apartheid again, I gon tell dem, “gwan da side.” We gon talk.
Yours respectfully,
Jai Lall
