Dear Editor,
HELLO, hello, is me Loo, alyuh own Guyanese, na no Chinese or Potaguese. A guess dese days me can even coin Africanese, Indianese, Amerindianese and yes, Europenese! Yes, we have plenty mix up mixes too! We can do we own thing and banna, is gonna be no big thing.
After all, dis is now a free country because we get independence and den we even go one step higher like how we flag fly above de courthouse, and claim Republic status.
Man, now all awe should be one family (but even Sparrow left his nest) because on Referendum Day, 99.9 per cent vote yes, so de story say. But in Guyana, when a Guyanese say “yu story,” is a different thing and yu know exactly wa dem wan fu tell you. So, na pretend yu na know wa dey talking about. Is one man vote no on de Referendum Day and he deh pun de moon.
One man and one woman write a book wid Creolese words. Is dat Guyanese or foreign? Remember, somebody else want fu claim we land. Depends pon who math yu using, dat might give yu two people or one people who mek up de book. When yu cook up de book is another thing. Like when we lose de NCM, bai you should see how big man and woman cry like lil baby.
We start fu sweat in de air condition office. We always taught dat we gon remain in power forever and no one can touch we or find out wa really going on. We can do anything we want. After all, we is de progeny of dictatorship and we use to courten nuff big people in high places.
But we smart too and we listen to de little birdy who was singing a different tune fu we own good, just in case, you know how the thing does wok sometimes.
We had to budge fu time because we couldn’t allow dem from de other side come in and find de true state of affairs. We had to white wash nuff thing, burn some, hide some, garbage some, leff out nuff and de bottom line, we had to stall fu time.
No wonder, dem who heading de PAC want jump higher to bruk de Guinness Book of Records and skip wa na good fu demselves. Yu see de hypocrisy? We want to blame dem who in office now when is we who questioning is to be blamed fu de neat mess!
Some strange things does really happen in dis country. Talk about magic, is only one magician dis country ever had. He magic wok and mek we disappear. And it look like we gon stay out a site for a long, long time to come too.
De man always vote yes because we beat it in he head to say yes. Now when de real day come and he vote yes, we vex. We say no dat he vote rang. We never tell de man to say no and we can’t read horoscope or be a mind reader. We stick to we trade, “Politricks.” Man, talk about people who can confuse yu!
We gon make dem in de “mad house” look good. Dat is why, when we go to de CCJ, de CCJ know exactly what kettle of fish dey dealing with. Dat is one sensible magician and he likes Moda earth and Modi too. He ran from we who want to hire only who look like we own and from we party. One man so vex wid we, he leff and say, “Who vex, vex.”
More deh whey dis come fram.
Yours respectfully,
Jai Lall.
